La Mocedá Independentista Revolucionario, Darréu, coincidiendo col Primeru de Mayu, Día Internacional de la Clas Trabayadora quier siguir calteniendo la denuncia que venimos realizando de la situación socioeconómica y política que ta viviendo'l nuesu país y el conxuntu de pueblos somorguiaos col capitalismu mundial y modernu.
Dende Darréu queremos insistir que la crisis social de la que tanto se fala nos medios de comunicación-empresa nun ye daqué nuevu n'Asturies, sinón una situación de crisis permanente que lleva fundiendo'l país dende va más de 30 años. Anguañu, col desastre'l sistema económicu mundial de corte neolliberal s'agravó inda más esta llaceriosa situación, qu'insistimos nun ye daque nuevu.
Llevamos más de 30 años asistiendo a privatizaciones, despidos masivos, traiciones sindicaleres o términos pantasmes como reconversión. Llevamos más de tres décades asistiendo a como fueron pesllando tola nuesa industria, les nueses mines y vendiendo'l campu y la pesca por cuatro perres a les vergoñoses imposiciones del Reinu d'España y la Xunión Europea, desaniciando asina tanto los sectores industriales como los sectores económicos tradicionales. Too ello foi acompangáu d'una mayor precariedá y unos progresivos retayos de les prestaciones sociales. La xubilación a los 67 años ye una bona amuesa d'ello.
Güei, en 2011, siguimos nes mesmes pero paez que'l Réximen golpea inda más fuerte al Pueblu Trabayador Asturianu. Estos últimos meses se roblaron los alcuerdos ente sindicatos amariellos y Gobiernos más vergoñosos de la hestoria reciente, con unos retayos de drechos sociales ensín precedentes. Pactos que traten de ser una forma de mercar la paz social al empar que siguen cubriendo les espaldes a la patronal y los mercáos estatales ya internacionales, col envís únicu de siguir esplotando y fundiendo na precariedá a les más de les persones del País Asturianu y el resto de pueblos. Mentanto ellos, los que manden, s'enriquecen ca vegada más a costa de les y los trabayadores, faciendo pagar a éstos una crisis de la que los primeramente citáos son responsables.
De la man d'esa ofensiva de los grandes mercáos, la banca y la patronal, vien nesti momentu una riestra de privatizaciones que tan faciendo que servicios públicos como la sanidá, les caxes d'aforros , los servicios municipales o la educación se conviertan nunes prestaciones reservaes pa una élite económica totalmente minoritaria. Dende una perspectiva moza, ye especialmente sangrante'l casu de la mercantilización de la educación, sobremanera na Universidá Pública, que ca día ye menos pública. La mocedá asturiano s'alcuentra con una situación bien murnia, yá que nun se-yos ufierten salides llaborales nin tampocu facilitase-yos una enseñanza al alcalce de toes y toos. Poro, ye normal qu'añu tres añu más de 18.000 mozos y moces tean na obligación d'emigrar d'Asturies de forma forciada.
Poro, dende la mocedá patriota y revolucionario asturiano facemos un llamáu a les moces y los mozos de la nuesa nación a francer con esta dinámica d'opresión capitalista concenxandose de que naide dende'l poder va regala-yos nada. L'únicu camín ye la llucha y l'autorganización del Pueblu Trabayador Asturianu de cara a conquistar tolos sos drechos sociales. Una llucha en defensa de los sos intereses coleutivos de clas cuyos pegoyos tienen de ser la defensa de los drechos nacionales d'Asturies, el socialismu y la solidaridá ente pueblos. Pa ello ye pernecesaria l'aportación de la mocedá, que ta siendo la mayor perxudicada d'esta situación y cuyu futuru baxo esti estáu de les coses ye bien escuru.
El Pueblu Asturianu tien de recuperar la so independencia política nacional pa poder desendolcarse de manera soberana como nación que ye. La soberanía p'Asturies ye vital pa poder salir de les cadarmes orgániques y estructurales del miserable capitalismu y avanzar haza'l Socialismu, un sistema socioeconómicu y políticu basáu na igualdá de toles persones qu'apare la mercantilización d'éstes y fine cola esplotación del home sobre l'home. Estes dos idees conxungaes, la de la soberanía y la emancipación social del Pueblu Asturianu tienen de dir xuníes a la solidaridá internacionalista colos demás pueblos del planeta na mesma situación.
¡ PUXA'L PRIMERU DE MAYU !
¡ PUXA LA CLAS TRABAYADORA !
¡ PUXA ASTURIES SOCIALISTA Y DIXEBRÁ !
No hay comentarios:
Publicar un comentario