Decenes de persones movilizáronse esti sábadu contra'l desmantelamientu de les cuenques mineres.

Delles decenes de persones participaron esti pasáu sábadu 9 de xunetu na xornada entamada dende la organización xuvenil d'izquierda soberanista-Darréu y CSI-Mocedá por unes cuenques pa vivir y trabayar dignamente. La xornada, qu'encuádrase dientru l'actividá que munches persones tan desenrollando en pro d'un futuru pa los conceyos de les cuenques y que trata d'aparar el desmantelamientu que ta sofriendo esta zona d'Asturies resultó positiva na opinión xeneral de la xente implicada.

Con ciertu retrasu, alredor de les 12:20 hores echó a andar la marcha contra'l desmantelamientu dende'l Parque Vieyu de la llocalidá llangreana de La Felguera. Demientres duró la marcha hebo tiempu pa canciar consignes reivindicatives y esparder el mensaxe de la necesidá de superar l'actual estáu de les coses nos valles del Caudal y el Nalón. Cientos de fueyes informatives fueron distribuyíes nos alredor de 6 quilómetros de camín hasta la llocalidá de L'Entregu (SMRA). La xente foi mui receptiva colos/es movilizaos/es y caltuvo una actitú perpositiva coles reivindicaciones d'estos y la idega xeneral de la xornada. Enantes de finar la marcha hebo tiempu pa averase a les istalaciones d'Alas Aluminium pa desixir una solución pa los/es trabayadores.

Depués de dalgo más d'hora y media s'aportó a la fin al centru social entreguín La Semiente, onde finó la marcha. Ellí se realizó una espicha que puxó pola autoxestión del centru y na cual hebo un ambiente positivu participando n'ella munches persones. Asina, hebo un ambiente relaxáu y distendíu hasta qu'entamó la charra-alderique que tenía como llema “les cuenques: una crisis estructural” a les 17:00 hores.

Na charra-alderique foron ponentes Paloma García pola organización de mocedá Darréu, Javier Cubero por CSI-Mocedá y Pablo Álvarez, delegáu de prevención nel Tallerón de Barros de Duro Felguera. Los tres coincidieron en señalar como les cuenques pasen por una crisis estructural y na necesidá de superar l'actual modelu social, económicu, y políticu amoldando un nuevu modelu haza les necesidaes de la mayoría social en les cuenques mineres. Amás Pablo Álvarez, trabayador de Duro Felguera, cuntó dende una perspectiva crítica la so visión de lo que vivió y ta viviendo nel taller de Barros y tolo que pasó nel últimu conflictu llaboral. Darréu de les intervenciones entamó una mesa reonda moderada por un compañeru de CSI-Mocedá, la cual s'allargó enforma y na que la xente coincidió enforma en que foi bien enriqueceora.

En resumen, la convocatoria d'esti pasáu sábadu valió p'axuntar a persones d'estremaes sensibilidaes con un mesmu oxetivu, el de puxar por un proyeutu de futuru pa les cuenques mineres contra l'hipotecamientu al que tamos asistiendo anguañu. Un futuru, por supuestu, dignu y que tea como pegoyu les necesidaes de les persones que viven en les cuenques y nesti país y non el caltener los privilexios de los mercaos y los políticos sucursalistes del Réximen. Hebo abonda unanimidá nel analis de la xornada, considerando a esta perpositiva y con dellos comentarios de tornar a repetir actividaes d'esti calter. Per otru llau dende la organización queremos da-y les gracies a toles persones que participaron nes estremaes actividaes y d'una forma u otra movilizáronse contra'l desmantelamientu de les cuenques mineres.

¡Por unes cuenques pa vivir y trabayar dignamente!

¡Non al desmantelamientu!