Dende la mocedá independentista y revolucionario queremos pronuncianos alrodiu de la fuelga xeneral convocada a nivel estatal y que, polo tanto, tendrá’l so desendolcu na nuesa nación.Otra vegada más, les centrales sindicales de CC.OO y UGT realicen una convocatoria de fuelga xeneral con retrasu, de la mesma manera qu’ocurrió n’anterior reforma llaboral desendolcada pol PSOE y que tuvo la so correspondiente xornada de fuelga, al igual qu’ésta vegada, dacuando la mesma yá ta siendo aplicada nos centros de trabayu en perxuiciu de los y les trabayadores afeutaes.
D’otru lláu, consideramos que la convocatoria de fuelga xeneral ta más que xustificada, y non sólo pola regresiva reforma llaboral aprobada pol gobiernu estatal formáu pol PP, sinón que también pola situación xeneral de crisis económica, llaboral, social, identitaria, cultural, etc. que dende va décades vien careciendo’l nuesu país. Sicasí, también ye evidente que dende’l sindicalismu mayoritariu enxamás se da una rempuesta específica que correspuenda al ámbitu asturianu, sinón que ye necesario que les centrales sindicales a nivel estatal dean la orde pa entamar a movilizase.
Poro, el sofitu de Darréu a la xornada de fuelga hai qu’atalantalu dientru del contestu xeneral de la nuesa nación, na que ye pernecesariu tou actu de protesta y contestación social escontra les élites polítiques y económiques que somorguien al nuesu país y los sos intereses a los de so, asina como a los intereses del estáu. Al mesmu tiempu, denunciamos la inoperancia a nivel autónomu de CC.OO y UGT d’Asturies , nun respondiendo polo tanto a los intereses concretos de la clas obrera asturiana, que vien requiriendo movilización dende va años ensin atopar rempuesta dala dende’l sindicalismu mayoritariu.
Amás, Darréu vindica una vegada más que la igua pa la situación xeneral del país, y nesti casu concretu pa la igua de les dificultaes que’l pueblu trabayador asturianu atopa nel tarrén llaboral, asina como la perda de drechos que vien sufriendo, ta na soberanía del pueblu asturianu, ye dicir, que’l pueblu asturianu seya quién a decidir el marcu de rellaciones llaborales nel que desenvolvese, atendiendo namái qu’a les necesidades concretes y especifiques de la nuesa clas obrera. Pa ello, como ye evidente, ye necesariu un nivel munchísimo mayor de soberanía nel tarrén políticu, dalgo poco factible cola actual estructura política ocupada por partíos que son dirixíos dende la capital del Reinu d’España.
Del mesmu móu que puxamos pola soberanía, dende la mocedá independentista camentamos una vegada más que’l pueblu asturianu nun tien otru camín qu’avanzar haza’l socialismu, considerando que baxo ési sistema nun se produciríen los atropellos a los drechos del pueblu trabayador que sí se desendolquen baxo la cadarma capitalista, n’actualidá na modalidá neoliberal. Amás d’ello, nun concebimos un pueblu soberanu dafechu que nun furrule baxo criterios socialistes, polo que la demanda de soberanía y socialismu van de la mano pa la nuesa organización.
En definitiva, Darréu vindica la soberanía y el socialismu como camín pa qu’Asturies algame los sos drechos como pueblu, y pa que’l propiu pueblu trabayador nun se vea agredíu mediante la regresión nes sos condiciones.
Tamién animamos a tola población, n’especial a la xente mozo, a secundar la xornada de fuelga’l prósimu xueves 29 de Marzu y a movilizase en defensa de los sos drechos llaborales dende criterios de clas, y de sofitu a les organizaciones sociales, polítiques y sindicales que dende l’espaciu alternativu tan trabayando pola movilización obrera dende un prima combativu’l prósimu xueves.
