Los sindicatos alternativos CSI, CXT y SUATEA anuncien la convocatoria d'una manifestación que tendrá llugar el prósimu xueves 22 de Marzu de magar les 19 hores na Plaza l'Humedal de Xixón pa protestar escontra la cabera reforma llaboral aprobada pol gobiernu estatal, escontra los recortes sociales de les distintes alministraciones públiques y en refugu de la ofensiva de les élites capitalistes pa quitar drechos a les clases populares.
Asina, manifiesten que "La realidá fala por sí mesma. Yá algamamos la cifra de 100.000 paraos y paraes n’Asturies y de 6 millones nel conxuntu l’Estáu español. Un millón y mediu de families, 35.000 d’élles asturianes, tienen a tolos sos miembros en paru; más de la metada los y les pensionistes cobren menos de 600 euros; el 50% de la mocedá ta nel paru; medio millón de families perdieren yá les sos viviendes y una de cada cuatru presones (el 25% la población) anda a la raya la probitú".
Amás, denuncien que "el Gobiernu del Estáu español yá anunció nueos recortes por valor d’unos 50.000 millones d’euros. Al empar, les sucesives reformes llaborales, los recortes sociales y les privatizaciones van facer xorrecer el paru y tornar el drechu a la Salú, la Educación y los Servicios Sociales nun privilexu al que namás van poder aceder aquéllos que puedan pagalu".
Pa la Corriente Sindical d'Izquierda, ún de los sindicatos convocantes, "la cabera Reforma Llaboral ta fecha al dictáu de la Patronal, porque pon fin a tolos drechos de los y les trabayadores, déxanos na indefensión dafechu y tórnanos en simples mercancíes en manes d’empresarios y especuladores", polo que refuguen "aceutar denguna negociación sobro esta Reforma Llaboral" y desixen "la so retirada darréu".
Pa finar, refuguen l' "entreguismu de les burocracies sindicales de CCOO y UXT, que nun quixeron apurrir igües nel pasáu nin van apurriles nel futuru".
Fonte: Infoasturies
No hay comentarios:
Publicar un comentario