¡Munches felicidaes a La Semiente!

Cúmplese un añu del Centru Social La Semiente

Samartín del Rei Aureliu

Cúmplese un añu desque s´abriera per primer vegada les puertes del “Centru Social La Semiente”: un espaciu abiertu, autoxestionáu y dinámicu; un añu de gran actividá, con autonomía de xestión, demostrando que, al marxe de les ayudes económiques, pueden faese munches coses y, sobremanera, faceles dende la más absoluta independencia que nos da’l nun ser una barriga agradecida de les instituciones

Pa celebralo con toles persones que pasaron perellí y con tol que quiera prepararon delles actividaes pa esti vienres día 20 d’abril. Pela tarde a les 18.30 h. nel Parque La Llaguna de L’Entregu (si llueve, fadrase nel mesmu centru social), un espectáculu de títeres pa tolos públicos va ser l’encargáu d’abrir la celebración d’aniversariu. Trátase del espectáculu “Ente mieos anda’l xuegu” de la compañía Pim Pam Títeres.

Una forma de recuperar aquellos espectáculos de guiñol qu’antaño s’esfrutaben peles cais del pueblu coincidiendo coles fiestes. Yá pela nueche, La Semiente entama una convite-pinchéu pa toes aquelles que quieran averase a celebralo. Dempués podrá vese un video con motivu del aniversariu, pa darréu pasar al yá habitual micru abiertu de La Semiente; onde s’espera que munchos de los escritores, músicos y demás amigos del colectivu nun se muerdan la llingua y amuesen el so arte nuna velada de confraternización y esfrute. La folixa ta asegurada.

A pesar de nun cuntar con gran repercusión mediática, de xuru se trate del colectivu social con mayor actividá cultural de Les Cuenques.

Fonte: www.aruelu.com