LA CSI LLAMA A LA XUNIDÁ DE LOS TRABAYADORES NES MOVILIZACIONES MINERES

Comunicáu íntengru de la CSI.

La Corriente Sindical d’Izquierda quier facer un llamamientu a la xunidá de los trabayadores de la minería y a la so participación en toles movilizaciones mineres que tan teniendo llugar n’Asturies.

Pa la CSI, tanto los enzarros mineros nos pozos Candín y Santiago, comu la concentración que va tener llugar el miércoles, 6 de xunu, en Mieres, comu les concentraciones y acampaes énte la Delegación de Gobiernu y les aiciones de los trabayadores que resisten énte les fuercies represores del Estáu español, son movilizaciones que tienen de ser sofitaes y secundaes pol conxuntu los y les trabayadores d’Asturies, dixebradamente de cuála seya la so filiación sindical.

La CSI pescancia imprescindible’l caltenimientu la xunidá de los y les trabayadores en toes estes movilizaciones, comu ferramienta pa defender, non sólo la economía de miles de families asturianes, sinon el futuru de les comarques mineres y del conxuntu la economía asturiana.

Asinamesmo, la CSI espera que los sindicatos SOMA-UXT Y CCOO, ten al altor de los trabayadores de la minería, defendiendo los drechos reales d’estos trabayadores y abandonando vieyes postures carauterizaes por negociaciones que, nel pasáu, namás supunxeron pieslles de pozos, perda de puestos de trabayu y especulación, cuandu non corruición, na xestión de los fondos mineros.

La CSI camienta que los sindicatos CCOO y SOMA-UXT cayeríen nuna enorme inresponsabilidá si, a estes altures del conflictu y con una fuelga indefinía ferviendo dafechu, francieren la xunidá que los trabayadores vienen calteniendo fasta l’intre y punxeren en pelligru la continuidá les esplotaciones mineres asturianes y el caltenimientu los puestos de trabayu.

Darréu d’ello, la CSI fae tamién un llamamientu a los dirixentes de CCOO y SOMA-UXT, pa que defendan, perriba cualisquier siegla, los drechos ya intereses comunes del conxuntu los trabayadores y abandonen tou intentu de negociación ispirada nos intereses particulares de cualisquiera de los dos sindicatos o de los sos propios dirixentes.