sábado, 29 de septiembre de 2012

Conceyu Abiertu por Llangréu pide la dimisión del gobiernu llocal pol escándalu de los Talleres del Conde





L'Ayuntamientu de Llangréu aprebó a la fin de forma oficial la suspensión del proyeutu de recintu ferial nos terrenos qu'ocupen los Talleres del Conde, en La Felguera. Nel vienres 28 de setiembre votose nel plenu municipal la paralización de les obres col votu a favor de PSOE, Izquierda Xunida y PP. Depués de meses d'inactividá, silenciu y escurantismu estes últimes selmanes l'equipu de gobiernu del PSOE en Llangréu yá foi dexando clara la so posición y la situación d'esti proyeutu. Agora'l proyeutu ta suspendíu de forma temporal de manera oficial, anque too paez indicar que la suspensión del proyeutu ye dalgo definitivu.
 
Dende Conceyu Abiertu por Llangréu pidimos de forma clara la dimisión de la totalidá de los responsables del equipu de gobiernu de Llangréu. Nun solo tamos falando d'una xestión nefasta, nin tampocu de despilfarru de dineru públicu, sinon que tamién el gobiernu llocal trató d'escuender la situación de pre-suspensión demientres dellos meses, llegando inclusu a mentir de forma clara a los llangreanos. Creemos qu'esti equipu de gobiernu yá tuvo'l so tiempu pa revertir la situación, pero'l gran desembolsu de dineru públicu pa proyeutos bien cuestionables, la mentira y la non finalización de dichos proyeutos ye la seña d'identidá del PSOE en Llangréu.

Atalantamos qu'esta suspensión ye definitiva, pesie los intentos de mazcaritar la situación como temporal y creemos que la xestión del Ayuntamientu nesti aspectu ye nefasta. Nel so día los vecinos y vecines del Conceyu de Llangréu yá amosaron ciertu descontentu claru col proyeutu inicial pero'l PSOE llocal, llideráu d'aquelles por Esther Diaz, tiró p'alantre con esti proyeutu. Esta iniciativa del gobiernu llangreanu de María Fernández supón hasta anguañu, que sepamos toles llangreanes y llangreanos, una inversión de más 1.800.000 euros, un dineral tiráu polos nuesos gobernantes llocal a la basoria.

Col dineru invertíu nesti fracasu, podríamos tener meyores equipaciones culturales, inversión n'industrialización o facer un desembolsu importante n'ayuda y prestación social, necesidaes que dende Conceyu Abiertu por Llangréu si qu'entendemos que son prioritaries. Poro, como yá diximos, atalantamos necesaria la dimisión del gobiernu llocal y desiximos que pidan disculpes públiques a tola ciudadanía llangreana por esti vergoñosu espectáculu. Pa finar, pidimos que s'investigue tol procesu d'esti proyeutu, yá que podríen dase irregularidaes importantes na xestión d'esti proyeutu, dalgo mui típicu nes iniciatives qu'empobina'l PSOE n'Asturies.

lunes, 24 de septiembre de 2012

Desconvocada la fuelga en ArcelorMittal

La empresa da marcha atrás na intención de descolgase del conveniu aplicando la reforma llaboral y aceuta negociar un nuevu acuerdu ensin presiones.

martes, 18 de septiembre de 2012

Conceyu Abiertu por Samartín pide l'esbroce y llimpieza de la vía L'Entregu-Bimenes

La formación popular Conceyu Abiertu por Samartín del Rei Aurelio desixe que se lleve a cabu esta actuación, desixida dende va tiempu por asociaciones vecinales y que se ta retrasando según denuncien nun comunicáu.
Conceyu Abiertu por Samartín desplica que "L'Asociación de Vecinos La Güeria Carrocera lleva yá un tiempu reclamando al Principáu trabayos de llimpieza y esbroce na carretera AS-338, que comunica L'Entregu con Bimenes. La última petición formal d'esta asociación vecinal ye d'entamos d'añu y entá estos vecinos de La Güeria Carrocera recibieron una rempuesta'l Principáu pa qu'actúe nesta vía autonómica. Coincidimos colos vecinos na necesidá d'una actuación urxente nesta carretera, yá que los llaos de la vía tan tomaos pola vexetación y les cunetes tan saturaes, nun drenando l'agua en casu lluvia y faciendo esta situación que l'agua desbórdese pela calzada ya inclusu entre nes cases de la xente. Amás, dalgunes de les señales de seguridá de la carretera nun se ven, lo que podría xenerar situaciones de peligru"
Al tiempu, denuncien que "Los vecinos lleven reclamando, como dicimos, una actuación al Principáu, que ye'l responsable, y una mediación al gobiernu llocal de Samartín del Rei Aurelio. L'actitú hasta'l momentu foi de autoritarismu y pasotismu con esti problema, non solo nun actuando pa iguar la situación, sinon inorando les peticiones formales y nin dignándose a dar una rempuesta formal del tipu que seya'l gobiernu. Dende l'asociación vecinal tamién reclamen la instalación d'una barandilla na ponte la Villa San Xosé, una obra que dende Conceyu Abiertu por SMRA tamién atalantamos como básica".
Amás, dende CA por Samartín espeyen "solidaridá con estos vecinos y el nuesu apoyu a les sos peticiones queremos denunciar públicamente l'actitú del Gobiernu del Principáu de despreciu a estos vecinos del nuesu conceyu y el pocu compromisu del Ayuntamientu de SMRA. Dambes instituciones tan gobernaes pol mesmu partíu, el PSOE, qu'una vuelta más espeya la so cara y la so natura antidemocrática y autoritaria. Camentamos que ye vergoñosa la falta de sensibilidá del PSOE coles necesidaes de la ciudadanía asturiana".
Tamién señalen que "les actuaciones han de tomase rápidu y han de ser afayaices pa estos vecinos y vecines. Aparte de consecuencies ambientales, de posibles inundaciones y de pérdides económiques la carretera nesti estáu tien unes deficiencies en seguridá víal sobre les que ye obligáu actuar pa iguar la situación de peligrosidá y de posibles accidentes"

lunes, 17 de septiembre de 2012

Frente al capital llucha social


                                                             Llangréu

miércoles, 12 de septiembre de 2012

Charra-alderique: "¿Qué 'plan de empleo' ye esti?"

L'Adepavan entama una charra-alderique pa esti xueves nel que se tratará alrodiu del polémicu Plan d'Empléu entamáu pol Ayuntamientu de Llangréu, que ta xenerando gran descontentu ente asociaciones y coleutivos sociales del conceyu asitiáu nel Valle'l Nalón. 

infoasturies.net

 

martes, 11 de septiembre de 2012

Conceyu Abiertu por Mieres - Aición de protesta pola abusiva xuba del preciu de bus en Mieres



El pasáu 20 d'agostu entró nel Conceyu de Mieres en vigor la xuba nel preciu'l billete de los autobuses municipales d'un 18 %, que se complemente cola xuba del 10% fecha fai dos años. Esta xuba empobinada pol gobiernu llocal y aprebada pol Principáu fai que'l tresporte públicu nel nuesu conceyu seya menos popular y munches persones, a la llarga, van notalo na so economía.
Creemos que los servicios públicos son intocables pero tamién ye intocable la so condición de serviciu y de contribución al bientar social. Sabemos que les arques municipales tienen un problema pergrande pero yá tamos fartos de ser siempres los mesmos, la mayoría social, los currantes, los que paguemos los pufos d'especuladores, políticos ensín ética nin principios y corruptos.
www.conceyuabiertu.org